SAMBRAMA WACANA RING PARIKRAMA MAPANDES ( MATATAH )
Ida-dane , para atiti miwah Uleman sane Baktinin Titiang
Angayubagia uningayang titiang majeng ring Ida Sang Hyang Widhi Wasa duaning majanten sangkaning asung kerta wara nugrahan Ida mawinan titiang prasida nglaksanayang parikrama mapandes ( matatah / potong gigi ) pianak titiang ring rahinane puniki.Antuk punika ngiring sinarengan nyakupang kara kalih ngojarang pangastungkara panganjali.
“Om Swastyastu”
Garjita dahat manah titiang santukan Ida dane arsa ledang nagingin pangaptin titiang , prasida ngerauhin sakadi mangkin saha muat bebaktan sane rahat-rahat pisan. Mantuk ring kaledangan Ida dane , titiang sakulawarga wantah prasida ngaturang rasa suksmaning manah . Bebaktan ida dane tunas titiang sungsung suun titiang pasuecan Ida dane sinamian . Ampurayang indik kakaonan genah miwah tata basa panyanggran titiang riantuk tambet titiang kalintang . Sampun majanten titiang nenten pacang prasida ngwalesin pasuecan Ida dane , dumogi Ida Hyang Widi Wasa pacang arsa mapaica pangwalesnyane manut swadharma miwah yasa kertin druene soang-soang.
Ida dane para atiti miwah uleman sane baktinin titiang , taler para sameton sane tresnasihin titiang . Sane mangkin lugrayang titiang pinaka reraman ipun nunas galah samatra anggen titiang nyihnayang anggan pianak titiang sane pacang katatahin utawi sane ketah kabaos kadi mangkin upacara potong gigi . Inggih sane mangkin kasinahang pianak titiang wenten tetiga sane paling wayaha panak titiang mawasta Putu Sumantra , sane kaping kalih mawasta Ni Kadek Widiani miwah sane kaping tiga mawasta komang Wandira . Duaning iraga dados umat hindu titiang pinaka reraman nyane sane kari madue piutang ring pianak jagi ngamargiang swadharmaning dados manusa inggih punika parikrama manusa yadnya puniki sane maiketan ring indik ngicalang kamomoangkaran I manusa sane mapikenoh ngaonang Sad Ripu , inggih punika nanem mesehe sane mamurti ring angga sariran I manusa . Antuka ring punika titiang nunas mangda ratu Ida dane utawi sameton titiang sane sampun ledang ngerauhin ring parikrama potong gigi / mapandes puniki mangdane ledang nyarengin ngastitiang ring Ida Sang Hyang Widi Wasa , mangdane ring sajeroning pamargi puniki prasida kasidaning don ngamolihang karahayuan lan kasukertan ring jagate.
Inggih kadi asapunika titiang prasida nagingin panyembramane puniki dumogi wenten pikenoh nyane . Malih apisan titiang matur suksma , taler nunas ampura pet prada wenten iwang antuk titiang nitenin panyanggrane puniki. Sane mangkin ledang Ida Dane masandekan , jumujug ring genah bhogane sane sampun kacumawisang . Malih ajebos yening sampun wusan anyita rasa bhoga , durusang ngambil acara bebas. Inggih cutetang titiang antuk ngaturang Parama Santih
“ Om Santih Santih Santih Om “
